Barcelona Ta Sanya Wa’adin Farkon Agusta Kan Cinikin Julián Álvarez
Sabbin rahotanni daga Spain sun bayyana cewa FC Barcelona ta sanya wa kanta wa’adin farkon watan Agusta domin kammala yunƙurin ɗaukar ɗan wasan gaba na Argentina, Julián Álvarez.
A cewar rahoton, Barcelona na shirin janye tayinta idan ba a cimma yarjejeniya kafin wannan wa’adin ba.
Karin Bayani 👇👇
Sir Alex Ferguson Ya Yabi Ƙwarewar Real Madrid a Kasuwar Musayar Yan Wasa
Sai dai duk da ƙoƙarin da Barcelona ke yi, Atlético Madrid na ci gaba da tsayawa kan matsayinsa cewa ba ya da niyyar sayar da Julián Álvarez a wannan kasuwar musayar ‘yan wasa.
Rahotannin sun nuna cewa Barcelona na son warware batun cikin gaggawa domin ta mai da hankali kan sauran shirye-shiryenta na kasuwar musayar ‘yan wasa.
Duk da haka, har zuwa yanzu ba a cimma wata yarjejeniya a hukumance ba, kuma Atlético Madrid ba ta nuna alamar sauya matsayinta ba.
Yanzu dai hankalin jama’a ya koma kan ko Atlético Madrid za ta ci gaba da riƙe Julián Álvarez, ko kuma Barcelona za ta janye tayinta idan wa’adin da ta sanya ya cika ba tare da cimma matsaya ba.